Հոկտեմբերի 19-ից 21-ը ես մասնակցեցի ռազմամարզական ճամբարին Արատեսում։ Մեզ հետ էին նաև Նորգյուղի միջնակարգ դպրոցի մի քանի սովորողներ իրենց մարզչի հետ։
Առավոտյան հավաքվեցինք Սուրբ Երրորդություն եկեղեցու բակում։ Մինչև ճամփա ընկնելը մտանք եկեղեցի, հետո տեղավորեցինք մեր իրերը և ճանապարհ ընկանք։ Ճանապարհին շատ ուրախ էինք՝ երգում էինք, խոսում ու ծիծաղում։
Երբ հասանք Արատես, տեղավորվեցինք, մի փոքր հանգստացանք և գնացինք ճաշելու։ Ճաշից հետո սկսվեցին մեր պարապմունքները։ Սովորեցինք, թե ինչպես պետք է կանգնեցնել արյունահոսությունը, ինչպես վարվել արտակարգ իրավիճակներում և ինչպես լինել զգոն ու պատրաստ։ Ունեցանք նաև շարային վարժանքներ։
Երեկոյան բոլորս հավաքվեցինք խարույկի շուրջ։ Երգեցինք, պարեցինք քոչարի, զրուցեցինք ու շատ լավ ժամանակ անցկացրինք։ Արատեսի գիշերը շատ գեղեցիկ էր՝ լի լռությամբ ու խաղաղությամբ։
Հաջորդ օրը արթնացանք վաղ առավոտյան։ Մաքրեցինք սենյակները, հետո մասնակցեցինք առավոտյան վարժանքին։ Նախաճաշից հետո միասին մաքրեցինք ամբողջ տարածքը։ Մի խումբ աղջիկներ գնացին մրգեր հավաքելու։
Հետո նորից պարապմունքներ ունեցանք։ Այս անգամ սովորեցինք զենքի հետ ճիշտ վարվել։ Սովորեցինք, թե ինչպես այն պահել և ինչպես անվտանգ օգտագործել։ Հետո ունեցանք խաղեր ու մրցումներ։
Ճաշելուց հետո գնացինք Սենյակ։ Այնտեղ լուսանկարներ արեցինք, նստեցինք, հանգստացանք։ Երեկոյան կրկին հավաքվեցինք խարույկի շուրջ։ Զրուցեցինք, երգեցինք ու վայելեցինք մեր վերջին երեկոն։
Երրորդ օրը արթնացանք, նախաճաշեցինք, հավաքեցինք մեր իրերը և մաքրեցինք տարածքը։ Մինչև ճանապարհ ընկնելը նստեցինք ընկերներով ու խոսեցինք մեր անցած օրերի մասին։ Բոլորս նույնը զգում էինք՝ չէինք ուզում հեռանալ։
Երբ սկսվեց անձրևը, քայլեցինք դեպի ավտոբուսը և գնացինք Սուրբ Հակոբ եկեղեցի։ Այնտեղ մի փոքր մնացինք, հետո վերադարձանք մեր դպրոց։
Այս երեք օրերը շատ հետաքրքիր էին։ Ես սովորեցի շատ նոր բաներ, ձեռք բերեցի նոր ընկերներ և լավ հիշողություններ։ Արատեսը ինձ համար մնաց որպես մի գեղեցիկ հիշողություն՝ լի ուրախությամբ, երգով ու ժպիտներով։
Ալեքս Մելիքյանի բլոգ 